لاب الكيمياء السريرية: target

كيف ترفع احتمال انك تجيب الtarget في الكيمياء السريرية:
- في حاجتين مهمة خالص لازم اقولها في الاول:
1. الtarget بالزات ما حاجة رورية 100%. طالما النتيجة صح ( hypo-, hyper-  او normal).... لانو في النهاية, الشغل في المستشفي بالاجهزة.
2."نهائي ما في استاذ مفروض يعرف بالطريقة دي! ولا تلمح ليو حتي انك عارفها!! لأنو لو في استاذ عرف ما حيرضي والتصحيح حيبقي كعب ده لو ما عملوا حاجة تانية!"
نبدا:
1. لمن نحنا ندخل لاب الكيميا, مكونات اللاب هي شنو؟:
1. المعدات:
test tubes, rack, colorimeter, etc
-الtest tubes  ممكن يكون فيها غبار, او مويه او باقي محلول من زول اشتغل قبلك!
دي ما كيميا اذا الزول ببدا الشغل اصلا بمعدات حتجيب الشغل غلط!
- الcolorimeter زاتو بيكون فيو مرات باقي محلول من زول كبكب (او في الامتحان اذا ما كنت المجموعة الاولي التشتغل).
نحنا قبل مده اشتغلنا اربعة لابات وره بعض...ما قدرنا نقرب من الtarget  حتي! مهما بقينا شغلنا دقيق!
القانون المسير لاب الكيمياء كلو هو قانون Beer-Lambert law:
"بيير ولامبارت قالوا: "لو في محلول عندو لون "ما شفاف" المحلول ده لونو مسبباو مادة. المادة دي تركيزا لو زاد, لون المحلول بتقل".
والcolorimeter شغال بالمبدأ ده. لو في حتي بصمات! علي الcuvette مستحيل الشغل يطلع دقيق!!
من ناحية بتاعت رياضيات:

بنقدر نتحكم في الR والV. الO  قيمة بنحفظها. صح؟
طيب: عشان نعرف القيمة الصحيحة لي تركيز الsample ( اللي هو الtarget.. اذا فكينا الstock صح.) نعمل كالاتي:
نعاين لي الارقام بتاعت الstandard  من قبل ما نفكو حتي:
الارقام من 0 لي 9.
ياتو فيهم قاعد في الstandard (لو stock او لا)؟
مثلا:
8,5
7
3,5
لو الرقم كان فوق العشرة ما بفرق! نشوفو بشبه ياتو رقم اقل من العشرة:
75 ....750....الخ هم:
7,5
ونشوف الرقم ده, نضربو في كم او نقسمو علي كم عشان يكون جوه الnormal range؟
750 والnormal range = 50-150....
نعمل شنو عشان نبقيو ما بين 50 – 150؟
نقسمو علي 10 = 75.
اذا كان 170؟
نقسمو علي 2 = 85.
وهكذا..
فك الstock  ببقي ساهل جدا بالخطوة دي. عشان ما اجرب رقم رقم, كل الارقام من 0 لي 10,000 ممكن تتحول لي رقم بين 0 لي 10.
طبعا مافي تركيز بجي 9,843.... ده مستحيل.....ولو جا, الرقم الفات ده ببساطة 9,8.
اذا الstandard مفكوك جاهز,  وصلنا الخطوة الاخيرة:
نلقي علاقة رياضية ما بين قراية الtest وقراية الstandard:
"علاقة رياضية" يعني شنو؟ يعني واحد فيهم يكون: ضعف, نص, ربع, تلت الخ.. التاني.
الstandard قرايتو كانت 50 والsample كانت قرايتو 42, ده معناها في شي غلط.
قراية الtest هي 50 (ال8 دي خطا. ما نحنا بشر في النهاية. زي ما قلنا: الغبار, المويه في tubes الخ... بتغير القراية)
لو كانت قراية الtest 19, معناها الtarget  25.
(اقرب رقم عندو علاقة رياضية مع 50  وقريب من القرية الظهرت هو 25)
الاجابة الهاية حتكون 2,5.
ده كل شي!

حاجات تعملها عشان ترفع جودة ادائك في (امتحان) لاب الطفيليات

قبل ما نتكلم عن "كيف تلقي اكبر عدد من الباراسايتس" في حاجات لازم الزول يخت بالو ليها. اولا, مرات العينة اصلا ما فيها باراسايتس كتيرة ومعمولة باختبار...عشان الاساتذة يشوفو منو البطلع ساي. طبعا زي ما انتو غالبا عارفين, العينة بتكون محضرة من عينات فيها مايكرو اوغانسم واحد. يعني بجيبو عينة فاضية وعينة مثلا فيها "اسكارس" وكم عينة تانية فيها اورغانسم معين. بعد كده بخلطوهم مع بعض. هل ده كل شي؟ لا. في تاني اهم حاجة الي هي: التركيز. ممكن الزول يخت الطفيليات بي تركيز مختلف حسب تركيز العينات ال"منقية" وفيها اورغانسم واحد. فتبقي:

- 25% Ascaris.
- 10% تريبونيلا.
- 5% ترايكنيلا.
والباقي عينة فاضية.

كده من الواضح انو درجة الترايكنيلا بتكون اعلي لانو هي بسيطة في العينة.
طيب, الخطوات المفروض الزول يتبعها شنو عشان يزيد احتمال انو يلقي اكبر عدد.


1. ما زي ما كتير من الطلبة بعملو, الجري للمايكروسكوب ما بفيد كتير. صدقوني. اذا الزول كلم اي استاذ, بغير ليو المايكروسكوب. انا في امتحان النهائي قعدت في سبعة مايكروسكوبات! وبحفظو ليك الزمن. يعني دي ما مشكلة. الزول يمشي للمايكروسكوب بي راحتو.

2. لحظة استلام العينة, الزول ما يجخها زي ما الاساتذة بيقولو. كده الباراسايتس بتشتت. امسك العينة واقلبها لمدة 4 لي 5 ثواني تقريبا او اطول وقت ممكن.
كل الباراسايتس حتتركز في الغطاء. افتح الغطاء براااحة ونقط تلاتة نقط علي الاسلايد.

3. ضبط المايكروسكوب مهم. اتاكد انو عدسة المايكوسكوب الجنب العين والجنب العينة نظيفة. نظفها بمنديل علي اي حال. الصورة الفي المايكروسكوب لازم تكون واضحة خالص وما قامتة. الاضاءة مظبوطة 100%.

4. افضل انو الزول ينادي استاذ بعرفو استاذ كان قراكم في اللاب. الاساتذة الغريبين بياخدوا وقت اطول. وفي التصحيح بكتبو رموز غريبة كده. ماحاجة مهمة 100% لاكين الاستاذ البتعرفو افضل. انا كنت بأخر اني انادي استاذ شويه لحدي ما يمر جنبي استاذ بعرفو (بس للضمان.)

5. مر ببطء علي العينة وانت بتعمل زقزاق. بطْء شديد. لانو غير كده عادي الزول ممكن يفط باراسايت. ماتشيل هم للزمن. لاكين سرعة المرور علي العينة لازم تكون كافية بحيث انو تشوف كل جسم واضح 100%.

6. اتاكد انك تصل الاطراف بتاعت الاسلايد 100%. ما تقول :"لا لا خلاص وصلت النهاية ارجع للاول. الضغط البعملو ال"كفر قلاس" علي الاسلايد ممكن يفرق مكونات العينة للاطراف خالص. ده نقط مهمة خالص. فعشان كده اصل الاطراف لحدي ما تشوف نهاية الكفر قلاس.

7. ممكن الزول يشيل معاو 2 كفر قلاس بدل واحد ويبقي في حقلين علي الاسلايد. (ما تسأل الاستاذ. ما حيلاحظ. الحاجة دي عملناها كتير ) ممكن الزول يمشي لي اقرب لاب في الجامعة ويطلب كفر قلاس. او ممكن برضو من لاب او مستشفي.
(حنتكلم في مرة عن : "كيف تخلي مستشفي او لاب بره الجامعة يحسنو كتير من ادائك في العملي في الجامعة.)
الاسلايد حتكون كده. 

ما بفرق كتير اذا الكفر قلاسين مفرقين ولا ملصقين. بس كده زي ما شايفين, في حقلين بدل واحد.

8. اتأكد تمام من انك عارف(ة) كيف تكتب اسم كل باراسايت. الاساتذ البصحح ليك عادي ممكن يديك غلط او ينقصك اذا شاف اسم الباراسايت غلط بدون ما حتي يوريك ( ده امتحان صح؟). ودي ما حاجة صعبة. خصوصا انو الاسماء دي حتلاقيكم في كل سنة مرات كتيرة.

طيب. ده كل شي. ارجو انو النصائح دي كانت مفيدة. صراحة حاجات بسيطة بس ما اتعلمناها الا بعد زمن. اذكر تاني بي انو الزول يتخيل نفسو في لاب حقيقي وده عينة مريض. صراحة ما مهم شديد الزول درجتو كم في كل امتحان. احسن الزول يعتبر نفسو بتعلم مهارات لي قدام لمن يطلع يشتغل في مستشفي ما فيها استاذ بصحح ليك شغلك.

يلا للمرة الجاية>>