مقدمة

اهلا! انا اسمي مبشر حسن. اتخرجت من كلية المختبرات الطبية الدفعة 16, 2014.ومن اول يوم لي في الجامعة (متذكرو كأنو امبارح) كان عندي هدف واحد: انو احقق اقصي استفادة من الاربعة سنين الحقضيها في الجامعة= اكتسب اقصي معرفة. (بالبساطة دي!) كنت متحمس جدا ومصمم اني احقق هدفي, دافعني شغفي للعلم عموما ومع اهداف تانية ,اني افرح الناس البيهم قدرت ادخل الجامعة.(ومنو المادافعو السبب الاخير ده؟) عشان كده بقيت تنافسي شديد (بالذات مع نفسي!) كنت دايما بحاول انتبه في المحاضرات, وبكتب ملاحظات. لاكين بسبب ظروف, اتعترت في الطريق واضطريت اغيب من محاضرات في خلال السنة. لاكين لسه كنت قادر اتابع الكورسات. ادائي كان بتفاوت من سنة لي سنة, لاكين كان بتحسن مع السنين واتعلمت كيف اعرف اكتر باقل جهد. (اتعلمت كيف اتعلم!) المشكلة كانت, اني لاحظت انو مهما اجتهدت كان شبه مستحيل اني ادي كل كورس افضل ما عندي! وبديت اتسائل السبب شنو! طموحي نهائي ما اختلف خلال السنين : اني احصل علي "امتياز" في كل مادة. لاكين بس بعد 3 سنين محاولة حتي يادوب عرفت المشكلة كانت وين! اكيد انا ماحالقي اللوم علي اي محاضر او الجامعة او اي ازول, ابدا! لأنو دايما كان ممكن اعمل افضل اذا رجع الزمن.....عشان كده جاتني فكرة اني اعمل المدونة دي: اني اوفر مصادر بسيطة بس تعبت عشان احصل عليها لي كل زول  يجي بعدي الكلية ويستفيد منها...واهم من كده: انبه الوراي من المشاكل الممكن تلاقي الزول في كل مادة! لانو الحاجات البسيطة دي انا كنت فاقدا ! عشان كده انشالله حاكتب عن كل تفاصيل مقرر كل كورس بتاع مادة وكل مشكلة انا بعرف ممكن تلاقي الزول خلال الاربعة سنين....امل انو المدونة تجيب النفع لي كل طالب في كلية المختبرات الطبية , جامعة العلوم والتقانة!
       مبشر.